धाराशिव: जिल्ह्यात गुन्हेगारीच्या घटनांमध्ये मोठी वाढ झाली असून, वेगवेगळ्या पोलीस ठाण्यांच्या हद्दीत जबरी चोरी, घरफोडी आणि केबल चोरीच्या घटना उघडकीस आल्या आहेत. परंडा तालुक्यात भरदिवसा एका महिलेला चाकूचा धाक दाखवून दीड लाखांचे दागिने लुटण्यात आले. तर तुळजापूर, लोहारा आणि धाराशिव ग्रामीण भागातही चोरीच्या घटना घडल्याने नागरिकांमध्ये भीतीचे वातावरण आहे.
१. गळ्याला चाकू लावून महिलेला लुटले (आंबी पोलीस ठाणे)
परंडा तालुक्यातील पांढरेवाडी शिवारात मोहिते वस्तीजवळील कॅनॉलच्या रोडवर एका महिलेला चाकूचा धाक दाखवून लुटल्याची धक्कादायक घटना बुधवारी (ता. २०) दुपारी साडेतीनच्या सुमारास घडली. मोहिनी संदीप पवार (वय ३०, रा. पांढरेवाडी) या शिवारातून लाकडे घेऊन पायी जात होत्या. यावेळी आरोपी लोल्या पिंटू काळे आणि इतर दोन अनोळखी इसमांनी त्यांना गाठले. त्यांच्या भोवती रिंगण करून एकाने त्यांच्या गळ्याला चाकू लावला. चाकूचा धाक दाखवून आरोपींनी त्यांच्या गळ्यातील अडीच तोळ्यांचे सोन्याचे गंठण व एक तोळ्याचे सोन्याचे फुले-झुबे असा एकूण १ लाख ४० हजार रुपयांचा ऐवज जबरदस्तीने हिसकावून नेला. याप्रकरणी मोहिनी पवार यांच्या फिर्यादीवरून आंबी पोलीस ठाण्यात भारतीय न्याय संहिता (BNS) कलम ३०९(६), ३(५) अन्वये गुन्हा दाखल करण्यात आला आहे.
२. बोरगावात सव्वा लाखांची घरफोडी (नळदुर्ग पोलीस ठाणे)
तुळजापूर तालुक्यातील बोरगाव येथे एका घराचे कडी-कोंडा तोडून चोरट्यांनी १ लाख १५ हजार रुपयांचा ऐवज लांबवला. ही घटना मंगळवारी (ता. १९) मध्यरात्री एक ते सकाळी सातच्या दरम्यान घडली. आप्पाराव शिवाजी मुळे (वय ६२) यांच्या घरातील ४० हजार रुपयांची रोख रक्कम आणि ७५ हजार रुपयांचे चांदीचे दागिने असा ऐवज चोरीला गेला आहे. या प्रकरणी मुळे यांनी दिलेल्या प्रथम खबरीवरून नळदुर्ग पोलीस ठाण्यात भा.न्या.सं. कलम ३३१(४), ३०५ अन्वये गुन्हा दाखल करण्यात आला आहे.
३. शेतातून ४० हजारांची केबल चोरी (लोहारा पोलीस ठाणे)
लोहारा तालुक्यातील तावशीगड शिवारात बालाजी मोहन पाटील (वय ३१, रा. माडज, ता. उमरगा) यांच्या शेतातून ४० हजार रुपये किमतीची केबल अज्ञातांनी चोरून नेली. त्यांच्या शेतातील (गट नं. ११३, ११९/१/१, २७/२/२, २७/२/४) पाच इलेक्ट्रिक पोलवरील ईक्को पँथर कंपनीची १४७० मीटर ॲल्युमिनियम केबल चोरट्यांनी कापून नेली. याप्रकरणी गुरुवारी (ता. २१) लोहारा पोलिसांत भा.न्या.सं. ३०३(२) नुसार गुन्हा नोंदवण्यात आला आहे.
४. सोलर प्लांटमधून ९० हजारांची केबल गायब (नळदुर्ग पोलीस ठाणे)
तुळजापूर तालुक्यातील होर्टी येथील उस्मानाबाद सोलार एनर्जी लिमिटेड कंपनीच्या प्लांटमधून ९० हजार रुपये किमतीची २४२ मीटर केबल चोरट्यांनी पळवली. ही घटना मंगळवारी (ता. १९) मध्यरात्री घडली. सुपरवायझर नजीर मुबारक शेख (वय ३८, रा. चिकुंद्रा) यांच्या फिर्यादीवरून गुरुवारी (ता. २१) नळदुर्ग पोलीस ठाण्यात अज्ञाताविरुद्ध गुन्हा दाखल करण्यात आला आहे.
५. चालत्या गाडीतून कपड्यांचे गठ्ठे पळवले (धाराशिव ग्रामीण पोलीस ठाणे)
बार्शी-येडशी रोडवर घाट चढत असताना चालत्या वाहनातून माल चोरीला गेल्याची घटना घडली आहे. आकाश बाळासाहेब काळे (वय २६, रा. खोमनाळा, ता. मंगळवेढा, जि. सोलापूर) यांची टाटा इंट्रा गाडी (एमएच १३ ई. पी. २५५४) येडशीकडे जात असताना अज्ञातांनी गाडीतील ३० हजार ८६९ रुपये किमतीचे ५ कपड्यांचे डाग (गठ्ठे) काढून नेले. याप्रकरणी गुरुवारी (ता. २१) धाराशिव ग्रामीण पोलीस ठाण्यात भा.न्या.सं. कलम ३०३(२) अन्वये गुन्हा दाखल करण्यात आला आहे.
