वाशी : शेत बटईने करण्याच्या कारणावरून झालेल्या वादातून एकाच कुटुंबातील सात जणांनी संगनमत करून एका वृद्ध व्यक्तीसह त्यांच्या पत्नी आणि मुलाला शिवीगाळ करत लाथाबुक्क्यांनी व दगडाने मारहाण करून जखमी केल्याची घटना धाराशिव जिल्ह्यातील वाशी तालुक्यातील विजोरा येथे घडली आहे. याप्रकरणी पीडित व्यक्तीने दिलेल्या फिर्यादीवरून वाशी पोलीस ठाण्यात सात आरोपींविरुद्ध विविध कलमांखाली गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी बबन त्र्यंबक भैरट (वय ६० वर्षे, रा. विजोरा, ता. वाशी, जि. धाराशिव) यांनी २३ मे २०२५ रोजी सायंकाळी ६ वाजण्याच्या सुमारास विजोरा शिवारातील चंद्रहास मारुती भैरट यांच्या घरासमोरील रस्त्यावर ही घटना घडल्याचे सांगितले. आरोपी सचिन हनुमंत खोसे, अमोल हनुमंत खोसे, हनुमंत यशवंत खोसे, तिलुबाई हनुमंत खोसे, उषा सचिन खोसे, पल्लवी अमोल खोसे आणि अश्विनी हनुमंत खोसे (सर्व रा. विजोरा, ता. वाशी, जि. धाराशिव) यांनी गैरकायद्याची मंडळी जमवून बबन भैरट, त्यांची पत्नी व मुलगा यांना शिवीगाळ केली. त्यानंतर त्यांना लाथाबुक्क्यांनी व दगडाने मारहाण करून जखमी केले आणि जीवे ठार मारण्याची धमकी दिली. शेत बटईने करण्याच्या कारणावरून हा वाद झाल्याचे फिर्यादीत म्हटले आहे.
याप्रकरणी बबन भैरट यांनी २४ मे २०२५ रोजी वाशी पोलीस ठाण्यात दिलेल्या प्रथम खबरेवरून आरोपींविरुद्ध भारतीय न्याय संहिता कलम १८९(२), १९१(२), १९१(३), १९०, ११८(१), ११५, ३५२, ३५१(२), ३५१(३), ३(५) अन्वये गुन्हा नोंदवण्यात आला आहे. पोलीस या प्रकरणाचा पुढील तपास करत आहेत.
