धाराशिवचा ‘गेम ऑफ थ्रोन्स’ (पार्ट २): ‘बिनविरोध’च्या नाटकामागील शकुनीमामा आणि देवाभाऊंची ‘तिसरी नजर’!

पहिल्या भागात आपण पाहिलं की धाराशिवच्या ‘कमळात’ सध्या एकमेकांचे काटे काढण्याची कशी जोरदार मोहीम सुरू आहे. पण थांबा, पिक्चर अभी बाकी आहे मेरे दोस्त! विधान परिषदेच्या या निवडणुकीत जेवढी मजा प्रत्यक्ष मतदानात आली नाही, त्यापेक्षा भन्नाट ड्रामा तिकीट वाटप आणि ‘बिनविरोध’च्या नाटकात झालाय.

‘बिनविरोध’च्या नावे ‘काड्यांचा’ खेळ!

धाराशिव, लातूर, बीड स्थानिक स्वराज्य संस्थेची ही निवडणूक बिनविरोध व्हावी, यासाठी औशाचे भाजप आमदार अभिमन्यू पवार आणि माजी आमदार राम सातपुते यांनी जोरदार फिल्डिंग लावली होती. सगळं काही ठरल्यासारखं सुरू होतं, पण ही निवडणूक ‘बिनविरोध’ कशी होऊ द्यायची? कुणाला तरी या राजकीय कुस्तीत स्वतःचीच ‘दहीहंडी’ फोडायची खाज होती! ही निवडणूक बिनविरोध कोणी होऊ दिली नाही आणि ऐनवेळी कुणी ‘काड्या’ केल्या, याची एवढी रसभरीत चर्चा सध्या धाराशिवच्या गल्लीबोळात सुरू आहे की, वेबसिरीजच्या लेखकांनाही इथून नवीन प्लॉट मिळेल!

तिकीट घरातच आणण्याचा ‘करपलेला’ मास्टरप्लॅन

बसवराज पाटील मुरूमकर यांना उमेदवारी मिळूच नये म्हणून एका महाशयांनी असा काही चक्रव्यूह रचला होता की चाणक्यालाही घाम फुटावा! प्लॅन असा होता: आधी एखाद्या दुसऱ्याच माणसाचं डमी नाव पुढे करायचं, त्याला बळीचा बकरा बनवायचं आणि मग श्रेष्ठींना सांगायचं, “अहो, हा उमेदवार कमकुवत आहे, त्यापेक्षा माझ्याच घरात तिकीट द्या की!”

स्वतःच्याच घरात उमेदवारीची पोळी भाजून घेण्याचा हा डाव अगदी ‘परफेक्ट’ होता. पण अतिशहाण्याला राजकारणात नेहमीच फटका बसतो, तसा तो इथेही बसला!

देवाभाऊंच्या ‘एक्सेल शीट’मध्ये सगळी नोंद!

या ‘ओव्हर-स्मार्ट’ मंडळींना वाटलं की आपलं हे राजकारण कुणालाच कळत नाहीये. पण मुंबईत बसलेल्या ‘देवाभाऊंची’ तिसरी नजर सगळ्यांवर होती! बसवराज पाटलांची उमेदवारी रोखण्यासाठी कुणी-कुणी दिल्ली ते गल्ली चकरा मारल्या, कुणी प्रॉक्सी नावं पुढे केली आणि कुणी स्वतःच्या घरासाठी फिल्डिंग लावली… या सगळ्याचा पक्का हिशोब आणि ‘रेकॉर्डिंग’ देवाभाऊंकडे सुरक्षित आहे.

त्यामुळेच, ज्यांनी हे उद्योग केले त्यांच्या पोटात आता खदखद सुरू आहे. ‘आपला नंबर कधी लागणार’ या भीतीने अनेकांची झोप उडाली आहे.

कट्ट्यावरचे ३ ‘यक्षप्रश्न’!

सध्या धाराशिव जिल्ह्याच्या कट्ट्यावर, चहाच्या टपरीवर आणि कार्यकर्त्यांच्या व्हॉट्सॲप ग्रुपवर हे ३ प्रश्न जोरदार गाजत आहेत:

• प्रश्न १: बसवराज पाटलांकडे मतदानासाठी थेट ‘पाकीट’ मागणारे ते भाजपचे महाभाग कोण? मतदानाच्या दिवशी बसवराज पाटील यांना कुणी त्रास दिला ?

• प्रश्न २: “ज्यांना मतदान द्यायचंय त्यांनी द्या आणि ज्यांना नकोय त्यांनी तसं करा” असा ‘निष्काम कर्मयोग’ शिकवणारे ते संतपुरुष नक्की कोण?

• प्रश्न ३: सगळं सुरळीत सुरू असताना, ही निवडणूक ‘बिनविरोध’ होऊ न देण्यासाठी पडद्यामागून सूत्रे हलवणारा तो ‘शकुनीमामा’ कोण?

(या ३ प्रश्नांची उत्तरे ज्याला मिळतील, त्याला धाराशिवच्या राजकारणात ‘पीएच.डी.’ मिळाल्यात जमा आहे!)