नळदुर्ग : बनावट आरटीओ चलनाच्या (RTO Challan) लिंकचा वापर करून एका तरुणाचे बँक खाते रिकामे केल्याचा धक्कादायक प्रकार धाराशिव जिल्ह्यात समोर आला आहे. नळदुर्ग येथील एका २४ वर्षीय तरुणाची तब्बल ६ लाख ९१ हजार ८०५ रुपयांची ऑनलाइन फसवणूक झाली असून, याप्रकरणी धाराशिव सायबर पोलीस ठाण्यात गुन्हा दाखल करण्यात आला आहे.
नेमकी घटना काय?
नळदुर्ग (ता. तुळजापूर) येथील खाजा नगरमधील रहिवासी अफरोज रफीक कुरेशी (वय २४) यांच्या मोबाईलवर ‘Xpress Digital’ (+1 555-463-0581) या क्रमांकावरून आरटीओ चलनाची एक संशयास्पद लिंक पाठवण्यात आली होती.
फिर्यादी अफरोज यांनी ती लिंक उघडून ॲप इन्स्टॉल केले असता, सायबर भामट्यांनी त्यांच्या मोबाईलचा ॲक्सेस मिळवला. त्यानंतर कोणत्याही पूर्वसूचनेशिवाय फिर्यादीच्या बँक खात्यातून टप्प्याटप्प्याने एकूण ६ लाख ९१ हजार ८०५ रुपये परस्पर काढून घेण्यात आले. खात्यातून रक्कम कमी झाल्याचे लक्षात येताच आपली फसवणूक झाल्याचे त्यांच्या निदर्शनास आले.
सायबर पोलिसांत गुन्हा दाखल
या फसवणुकीप्रकरणी अफरोज कुरेशी यांनी दिलेल्या फिर्यादीवरून १८ ऑगस्ट २०२६ रोजी धाराशिव सायबर पोलीस ठाण्यात भारतीय न्याय संहिता (BNS) कलम ३१८(४) सह माहिती तंत्रज्ञान कायदा (IT Act) कलम ४३, ६६(सी) आणि ६६(डी) अन्वये गुन्हा नोंदवण्यात आला आहे. या प्रकरणाचा पुढील तपास सायबर पोलीस करत आहेत.
नागरिकांना सायबर पोलिसांचे आवाहन:
अनोळखी क्रमांकावरून येणाऱ्या कोणत्याही ई-चलन, वीज बिल किंवा बँक अपडेटच्या लिंकवर क्लिक करू नका. तसेच अनोळखी लिंकवरून कोणतेही ॲप मोबाईलमध्ये डाऊनलोड करू नका, असे आवाहन पोलिसांकडून करण्यात आले आहे.
