परंडा : तालुक्यातील खासापुरी नं. २ येथे न्यायालयीन खटला मागे घेण्याच्या कारणावरून एका ६५ वर्षीय वृद्धाला आणि त्यांच्या पत्नीला कोयत्याने आणि लाथाबुक्क्यांनी जबर मारहाण केल्याची घटना समोर आली आहे. याप्रकरणी जखमी वृद्धाच्या फिर्यादीवरून परंडा पोलीस ठाण्यात सहा जणांवर गुन्हा दाखल करण्यात आला आहे.
याबाबत सविस्तर वृत्त असे की, उत्रेश्वर किसन धनवे (वय ६५, रा. खासापुरी नं. २, ता. परंडा) यांनी पोलिसांत फिर्याद दिली आहे. फिर्यादीनुसार, ही घटना ९ ऑक्टोबर २०२५ रोजी सायंकाळी ६:३० च्या सुमारास घडली. आरोपींनी फिर्यादी उत्रेश्वर धनवे यांना गाठून “तू कोर्टातील केस काढून घेतोस की नाही,” अशी विचारणा करत वाद घातला. त्यानंतर, आरोपींनी गैरकायद्याची मंडळी जमवून फिर्यादीस शिवीगाळ केली आणि लाथाबुक्क्यांनी तसेच कोयत्याने मारहाण करून जखमी केले.
यावेळी फिर्यादीची पत्नी प्रभावती धनवे या भांडण सोडवण्यासाठी मध्यस्थी करण्यास आल्या असता, आरोपींनी त्यांनाही शिवीगाळ करत मारहाण केली आणि जीवे ठार मारण्याची धमकी दिली.
गुन्हा दाखल झालेले आरोपी:
या प्रकरणी खालील सहा जणांवर गुन्हा दाखल करण्यात आला आहे:
१. तुकाराम नामदेव धनवे २. चेतन उर्फ चैतन्या तुकाराम धनवे ३. इजूबाई नामदेव धनवे ४. शेषेराव विनायक धनवे ५. विलास विनायक धनवे ६. विलास नाना यादव (सर्व रा. खासापुरी नं. २, ता. परंडा)
पोलिस कारवाई:
उत्रेश्वर धनवे यांनी दिलेल्या वैद्यकीय जबाबावरून २५ डिसेंबर २०२५ रोजी परंडा पोलीस ठाण्यात गुन्हा नोंदवण्यात आला आहे. पोलिसांनी भारतीय न्याय संहिता (B.N.S.) कलम ११८(१), ११५(२), ३५१(३), १८९(२), १९१(२), १९१(३), १९० तसेच आर्म ॲक्ट कलम ४/२५ अन्वये गुन्हा दाखल केला असून, पुढील तपास परंडा पोलीस करत आहेत.
