कळंब : शहरातील अनिल भोजनालय ते सावित्रीबाई फुले शाळेकडे जाणाऱ्या रस्त्यावर एका ६५ वर्षीय वृद्ध महिलेच्या हातातील ९० हजार रुपयांची रोख रक्कम दोन अज्ञात दुचाकीस्वार चोरट्यांनी हिसकावून नेल्याची घटना घडली आहे. ही घटना गुरुवारी (दि. १२) दुपारी घडली असून, याप्रकरणी कळंब पोलीस ठाण्यात गुन्हा दाखल करण्यात आला आहे.
याबाबत अधिक माहिती अशी की, संगिता फुलचंद कोळी (वय ६५, रा. गोविंदपूर, ता. कळंब) या गुरुवारी, दिनांक १२ जून २०२५ रोजी दुपारी ३ वाजण्याच्या सुमारास कळंब शहरातील अनिल भोजनालय ते सावित्रीबाई शाळेकडे जाणाऱ्या सिमेंट रस्त्यावरून जात होत्या. यावेळी एका मोटरसायकलवरून आलेल्या दोन अज्ञात इसमांनी त्यांच्याजवळील अंदाजे ९०,००० रुपयांची रोख रक्कम चोरून पळ काढला. दिवसाढवळ्या वर्दळीच्या रस्त्यावर घडलेल्या या घटनेमुळे शहरात खळबळ उडाली आहे.
या घटनेनंतर संगिता कोळी यांनी शनिवारी, दिनांक १४ जून २०२५ रोजी कळंब पोलीस ठाण्यात फिर्याद दिली. त्यांच्या तक्रारीवरून पोलिसांनी दोन अज्ञात चोरट्यांविरोधात भारतीय न्याय संहिता कलम ३०३(२) अन्वये गुन्हा नोंदवला आहे. पोलीस परिसरातील सीसीटीव्ही फुटेजच्या आधारे आरोपींचा शोध घेत आहेत.
