लोहारा : लोहारा तालुक्यातील भातागळी येथे राज्य शासनाने प्रतिबंधित केलेला गुटखा आणि तंबाखूजन्य पदार्थांची बेकायदा विक्री करण्यासाठी बाळगल्याप्रकरणी लोहारा पोलिसांनी धडक कारवाई केली आहे. या कारवाईत पोलिसांनी १० हजार ८०० रुपयांचा गुटखा व पान मसाला जप्त केला असून, एकाविरुद्ध लोहारा पोलीस ठाण्यात गुन्हा दाखल करण्यात आला आहे.
सचिन शंकर वाले (वय ४६, रा. भातागळी, ता. लोहारा, जि. धाराशिव) असे याप्रकरणी गुन्हा दाखल झालेल्या आरोपीचे नाव आहे.
पोलिसांनी दिलेल्या माहितीनुसार, मंगळवारी (ता. १९) सकाळी ११ वाजेच्या सुमारास भातागळी येथे ही कारवाई करण्यात आली. आरोपी सचिन वाले याने महाराष्ट्र शासनाने प्रतिबंधित केलेला गुटखा, केसरयुक्त विमल पान मसाला आणि तंबाखूचे पुडे विक्री करण्याच्या उद्देशाने स्वतःजवळ बाळगल्याची माहिती पोलिसांना मिळाली होती. त्यानुसार लोहारा पोलिसांच्या पथकाने छापा टाकून झडती घेतली असता, त्याच्याकडे १० हजार ८०० रुपये किमतीचा प्रतिबंधित माल आढळून आला.
पोलिसांनी तात्काळ हा सर्व बेकायदेशीर मुद्देमाल जप्त केला आहे. याप्रकरणी पोलिसांच्या फिर्यादीवरून लोहारा पोलीस ठाण्यात भारतीय न्याय संहिता (BNS) कलम १२३, २२३, २७४, २७५ सह अन्न सुरक्षा व मानके अधिनियम कलम ५९ अन्वये आरोपीविरुद्ध गुन्हा नोंदवण्यात आला आहे. या घटनेचा पुढील तपास लोहारा पोलीस करत आहेत.
