धाराशिव : तुळजापूर येथील श्री तुळजाभवानी मंदिराच्या मुख्य गाभाऱ्याच्या आणि शिखराच्या पुनर्बांधणीबाबत मोठा वाद निर्माण झाला आहे. पुरातत्त्व विभागाने केलेल्या स्ट्रक्चरल रिपोर्टमध्ये मुख्य मंदिर पाडण्याचा निर्णय असल्याची माहिती समोर येताच, मंदिराच्या पुजाऱ्यांनी या निर्णयाला तीव्र विरोध दर्शवला आहे.
गाभाऱ्याच्या जुन्या शिळाच बदलाव्यात – पुजाऱ्यांची मागणी
मंदिराच्या गाभाऱ्यात काही ठिकाणी तडे गेलेल्या शिळा आहेत. त्या बदलण्याची गरज असली, तरी संपूर्ण मंदिर पाडण्याची आवश्यकता नाही, असा पुजाऱ्यांचा आग्रह आहे. मुख्य शिखर आणि संपूर्ण मंदिर संरक्षित ठेवत योग्य रीतीने दुरुस्ती करावी, अशी त्यांची मागणी आहे.
केंद्राच्या पुरातत्त्व विभागाकडून सल्ला घ्यावा
पुरातत्त्व विभागाने तयार केलेला स्ट्रक्चरल रिपोर्ट बदलून केंद्र सरकारच्या पुरातत्त्व विभागाकडून सल्ला घ्यावा, अशी पुजाऱ्यांची भूमिका आहे. महाराष्ट्रातीलच नव्हे, तर संपूर्ण देशभरातील भाविकांच्या श्रद्धेचा विचार करून हा निर्णय व्हायला हवा, असे ते म्हणाले.
सल्लामसलत करून निर्णय घ्यावा – पुजाऱ्यांचा इशारा
मंदिराच्या पुनर्बांधणीसाठी कोणताही निर्णय घेताना एकतर्फी निर्णय न घेता, सर्व संबंधितांशी चर्चा करून तो घ्यावा, अशी मागणी पुजाऱ्यांनी केली आहे. पुरातत्त्व विभागाने मनमानी पद्धतीने काम न करता, भाविकांच्या आणि धार्मिक परंपरांच्या दृष्टीने निर्णय घ्यावा, अन्यथा यास तीव्र विरोध केला जाईल, असा इशाराही त्यांनी दिला आहे.
श्री तुळजाभवानी मंदिर कोट्यवधी भक्तांचे श्रद्धास्थान आहे. त्यामुळे या प्रकरणावर भाविकांचेही लक्ष लागले असून, पुढील निर्णय काय होतो, हे पाहणे महत्त्वाचे ठरणार आहे.
