तुळजापूर: तुळजापूर येथील शासकीय जागेवर उभारण्यात आलेले ‘छत्रपती एक्झिक्युटिव्ह’ हे अनाधिकृत बांधकाम प्रशासनाने न पाडल्यास, येत्या ३१ डिसेंबर २०२५ रोजी धाराशिव जिल्हाधिकारी कार्यालयासमोर आत्मदहन करण्याचा गंभीर इशारा सामाजिक कार्यकर्ते दादाराव उर्फ विजय गजेंद्र मुंडफणे यांनी दिला आहे. यासंदर्भात त्यांनी जिल्हाधिकाऱ्यांना निवेदन सादर केले आहे.
नेमके प्रकरण काय?
मुंडफणे यांनी दिलेल्या तक्रारीनुसार, तुळजापूर येथील वेताळ नगर, कार पार्किंग जवळील सर्वे नंबर २१५ मधील शासकीय जागेवर बोगस कागदपत्रांच्या आधारे अतिक्रमण करण्यात आले आहे. या ठिकाणी ‘छत्रपती एक्झिक्युटिव्ह’ या नावाने व्यावसायिक बांधकाम करण्यात आले असून, यात शासनाची फसवणूक झाल्याचा आरोप करण्यात आला आहे.
गुन्हा दाखल, तरीही कारवाई नाही
या प्रकरणी पाठपुरावा केल्यानंतर, मुंबई उच्च न्यायालयाच्या आदेशानुसार तुळजापूर नगर परिषदेच्या मुख्याधिकाऱ्यांनी जागा मालक दत्तोबा उर्फ बापूसाहेब रावजी भोसले यांच्याविरोधात गुन्हा दाखल केला आहे. पोलीस ठाणे तुळजापूर येथे गुरनं २७०/२०२५, कलम ५३ (एमआरटीपी ॲक्ट) अन्वये हा गुन्हा नोंदवण्यात आला असून पोलिसांनी दोषारोपपत्र देखील न्यायालयात सादर केले आहे.
प्रशासनावर दिरंगाईचा आरोप
मुख्याधिकाऱ्यांनी निवडणुकीनंतर बांधकाम पाडण्याचे तोंडी आश्वासन दिले होते, तसेच तहसीलदारांकडे मागील तीन महिन्यांपासून यावर सुनावणी सुरू असून केवळ ‘तारखा’ मिळत असल्याचे मुंडफणे यांचे म्हणणे आहे. कारवाई होत नसल्याने प्रशासनाच्या भूमिकेवर संशय व्यक्त केला जात आहे.
आत्मदहनाचा इशारा
प्रशासकीय अधिकारी हे प्रकरण गांभीर्याने घेत नसल्याने, जर ३१ डिसेंबर २०२५ पर्यंत हे बेकायदेशीर बांधकाम पाडले नाही, तर उच्च न्यायालयात अवमान याचिका दाखल करण्यात येईल आणि त्याच दिवशी जिल्हाधिकारी कार्यालयासमोर आत्मदहन केले जाईल, असे दादाराव मुंडफणे यांनी आपल्या निवेदनात स्पष्ट केले आहे. या आंदोलनास मुख्याधिकारी आणि तहसीलदार जबाबदार असतील, असेही त्यांनी नमूद केले आहे.
या निवेदनाच्या प्रती पोलीस अधीक्षक धाराशिव, मुख्याधिकारी तुळजापूर आणि तहसीलदार तुळजापूर यांना पाठवण्यात आल्या आहेत.
