तुळजापूर : तुळजापूर तालुक्यातील खडकी शिवारात एका शेतातून बेकायदेशीरपणे मुरुम वाहून नेण्यास विरोध केला म्हणून एका ६० वर्षीय वृद्धाला बेदम मारहाण केल्याची धक्कादायक घटना समोर आली आहे. या प्रकरणी तामलवाडी पोलीस ठाण्यात आरोपींसह जेसीबी चालक आणि इतर १२ जणांवर गुन्हा दाखल करण्यात आला आहे.
नेमकी घटना काय?
मिळालेल्या माहितीनुसार, खडकी (ता. तुळजापूर) येथील रहिवासी तुकाराम मकुराम मनसावले (वय ६० वर्षे) यांचे खडकी शिवारात शेत आहे. दिनांक ९ जून २०२६ रोजी संध्याकाळी ६:१५ वाजण्याच्या सुमारास आरोपींनी त्यांच्या शेतातून मुरुम काढण्यास सुरुवात केली.
तुकाराम मनसावले यांनी, “माझ्या शेतातील मुरुम का घेऊन जाता?” असा जाब आरोपींना विचारला. याचा राग आल्याने आरोपी नितीन बंडू जाधव, रवी जाधव (दोघे रा. खडकी), जेसीबी चालक आणि त्यांच्यासोबत असलेल्या इतर १२ इसमांनी मिळून बेकायदेशीर गर्दी जमवली.
लाथाबुक्यांनी मारहाण आणि जीवे मारण्याची धमकी
वाद वाढल्यानंतर संतापलेल्या आरोपींनी ज्येष्ठ नागरिक असलेल्या तुकाराम यांना घाणेरडी शिवीगाळ करण्यास सुरुवात केली. एवढ्यावरच न थांबता त्यांनी तुकाराम यांना लाथाबुक्यांनी बेदम मारहाण केली. तसेच “पुन्हा मध्ये आलास तर जेसीबीच्या बकेटने मारून टाकू,” अशी जीवे ठार मारण्याची धमकी दिली.
तामलवाडी पोलिसांत गुन्हा दाखल
मारहाणीत जखमी झालेल्या तुकाराम मनसावले यांच्यावर वैद्यकीय उपचार करण्यात आले. त्यानंतर त्यांनी दिलेल्या वैद्यकीय जबाबाच्या (एमएलसी) आधारे, दिनांक १३ जून २०२६ रोजी तामलवाडी पोलीस ठाण्यात गुन्हा नोंदवण्यात आला आहे. पोलिसांनी आरोपींविरुद्ध भारतीय न्याय संहिता (BNS) कलम ११८(१), १९१(२), १९१(३) आणि १९० अन्वये गुन्हा दाखल केला असून पुढील तपास तामलवाडी पोलीस करत आहेत.
