उमरगा – उमरगा येथील सामाजिक वनीकरण विभागाच्या वनपरिक्षेत्र कार्यालयात भरदिवसा घुसून कर्तव्यावर असलेल्या एका वनरक्षकाच्या अंगावर आणि डोक्यावर बाटलीतून काळा रंग (शाई) ओतून शासकीय कामात अडथळा निर्माण केल्याची खळबळजनक घटना घडली आहे. याप्रकरणी उमरगा पोलीस ठाण्यात एका नामजद आरोपीसह इतर दोघांविरुद्ध शासकीय कामात अडथळा आणल्याप्रकरणी गुन्हा दाखल करण्यात आला आहे.
नेमकी घटना काय?
माळकोडजी (ता. औसा, जि. लातूर) येथील रहिवासी काका बापुराव मगर (वय ५३ वर्षे) हे उमरगा येथील सामाजिक वनीकरण विभागाच्या वनपरिक्षेत्र कार्यालयात वनरक्षक म्हणून कार्यरत आहेत. १६ सप्टेंबर २०२६ रोजी दुपारी १.४५ वाजेच्या सुमारास ते कार्यालयात मजुरांच्या मस्टरचे (हजेरी पत्रक) शासकीय काम करत बसले होते.
त्यावेळी संशयित आरोपी संदीप अनुरथ गायकवाड हा इतर दोन साथीदारांसह कार्यालयात घुसला. “काका मगर कोण आहे?” अशी विचारणा करत आरोपींनी मगर यांच्या हाताला पकडले आणि सोबत आणलेल्या बाटलीतील काळा रंग त्यांच्या डोक्यावर तसेच कपड्यांवर ओतून त्यांचे अंग व कपडे खराब केले. कार्यालयात गोंधळ घालून आरोपींनी वनरक्षकाला शासकीय कर्तव्य पार पाडण्यापासून रोखत कामात अडथळा आणला.
उमरगा पोलिसांत गुन्हा नोंद
शासकीय कार्यालयात घडलेल्या या गैरकृत्याप्रकरणी १६ सप्टेंबर २०२६ रोजी उमरगा पोलीस ठाण्यात तक्रार देण्यात आली. त्यावरून पोलिसांनी आरोपी संदीप अनुरथ गायकवाड व इतर दोन अनोळखी इसमांविरुद्ध भारतीय न्याय संहिता (BNS) कलम १३२ (शासकीय कर्मचाऱ्यावर हल्ला किंवा कामात अडथळा), २२४, ११५(२), ३२४(२) आणि ३(५) अन्वये गुन्हा नोंदवला आहे. या प्रकरणाचा पुढील तपास उमरगा पोलीस करत आहेत.
