कळंब: कळंब नगरपालिकेतील ठाकरे गटाच्या १० नगरसेवकांनी भाजपमध्ये प्रवेश केल्याने स्थानिक राजकारणात मोठी खळबळ उडाली आहे. या राजकीय घडामोडीवर शिवसेना ठाकरे गटाचे आमदार कैलास पाटील यांनी अत्यंत आक्रमक आणि रोखठोक प्रतिक्रिया नोंदवली आहे.
“आम्ही आमच्या चुकांमधून धडा घेऊ, पण ज्यांनी चूक केली आहे त्यांना धडा शिकवल्याशिवाय राहणार नाही!”
— आमदार कैलास पाटील
आमदार कैलास पाटील यांच्या प्रतिक्रियेतील महत्त्वाचे मुद्दे:
-
गद्दारांना जिल्ह्याचा इतिहास माहीत आहे: धाराशिव जिल्ह्यात यापूर्वी ज्यांनी-ज्यांनी उद्धव ठाकरेंची साथ सोडली, त्यांचे राजकीय भवितव्य काय झाले हे सर्वांना चांगलेच माहीत आहे, असा थेट इशारा त्यांनी दिला.
-
संघर्ष करणाऱ्या कार्यकर्त्यांच्या बळावर पुन्हा उभे राहू: पक्षांतर करणाऱ्यांमुळे पक्ष संपत नाही. रस्त्यावर उतरून पक्षासाठी घाम गाळणाऱ्या निष्ठावंत कार्यकर्त्यांना सोबत घेऊन आम्ही पुन्हा लढा देऊ आणि सर्वसामान्यांचा बुलंद आवाज बनू.
-
बैठकीला गैरहजर असणारेच फुटले: पक्षप्रमुख उद्धव ठाकरे यांच्या नुकत्याच झालेल्या बैठकीला हे १० नगरसेवक आधीच गैरहजर होते. जे बैठकीला उपस्थित होते, ते पूर्णपणे निष्ठावंत असून पक्षासोबत खंबीरपणे उभे आहेत.
