धाराशिव – धाराशिव स्थानिक गुन्हे शाखेच्या (LCB) पथकाने अण्णाभाऊ साठे चौकात सापळा रचून एका सराईत दुचाकी चोरट्याला जेरबंद केले आहे. त्याच्याकडून आनंदनगर, धाराशिव ग्रामीणसह औसा आणि कर्जत पोलीस ठाण्याच्या हद्दीतून चोरीस गेलेल्या एकूण १ लाख ८५ हजार रुपये किमतीच्या ४ मोटारसायकली जप्त करण्यात आल्या आहेत.
नेमकी कारवाई कशी झाली?
पोलीस अधीक्षक श्रीमती रितु खोखर व अपर पोलीस अधीक्षक सचिन पांडकर यांच्या आदेशानुसार स्थानिक गुन्हे शाखेचे सहाय्यक पोलीस निरीक्षक अमोल मोरे व त्यांचे पथक २४ ऑगस्ट २०२६ रोजी धाराशिव जिल्ह्यातील अभिलेखावरील गुन्हे उघडकीस आणण्यासाठी पेट्रोलिंग करत होते.
या दरम्यान पथकाला गोपनीय बातमीदारामार्फत माहिती मिळाली की, शहरातील अण्णाभाऊ साठे चौकात एक इसम चोरीची मोटारसायकल घेऊन उभा आहे. माहिती मिळताच पथकाने तातडीने घटनास्थळी धाव घेऊन संशयिताला ताब्यात घेतले. त्याची चौकशी केली असता त्याने आपले नाव परमेश्वर उर्फ सुरेश चंदर काळे (वय ४० वर्षे, रा. जुना बस डेपो जवळ, पारधी पिढी, धाराशिव) असे सांगितले.
४ दुचाकी जप्त; आंतरजिल्हा गुन्हे उघडकीस
सुरुवातीला आरोपीने पोलिसांना उडवाउडवीची उत्तरे दिली; मात्र पोलिसी खाक्या दाखवून विश्वासात विचारपूस केली असता, त्याने विविध ठिकाणांवरून मोटारसायकली चोरून त्या लपवून ठेवल्याची कबुली दिली. पथकाने तातडीने त्या ठिकाणी जाऊन शोध घेतला असता एकूण १ लाख ८५ हजार रुपये किमतीच्या ४ मोटारसायकली मिळून आल्या.
गुन्हे अभिलेखाची पडताळणी केली असता या मोटारसायकली आनंदनगर, धाराशिव ग्रामीण, तसेच लातूर जिल्ह्यातील औसा आणि अहिल्यानगर जिल्ह्यातील कर्जत पोलीस ठाण्याच्या हद्दीतून चोरीला गेल्याचे निष्पन्न झाले आहे. आरोपीसह जप्त केलेल्या दुचाकी पुढील कारवाईसाठी आनंदनगर पोलीस ठाण्याच्या ताब्यात देण्यात आल्या आहेत.
कारवाई करणारे पोलीस पथक
ही उल्लेखनीय कामगिरी पोलीस अधीक्षक श्रीमती रितु खोखर, अपर पोलीस अधीक्षक सचिन पांडकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सहाय्यक पोलीस निरीक्षक अमोल मोरे, पोलीस अंमलदार समाधान वाघमारे, राहुल नाईकवाडी, बळीराम शिंदे, अमोल चव्हाण, महिला पोलीस अंमलदार शोभा बांगर, चालक पोलीस अंमलदार दहिहांडे आणि शेरखाने यांच्या पथकाने केली आहे.
