तुळजाभवानी मंदिराच्या सुरक्षेवरून सरनाईक-पाटील आमनेसामने; ‘ऑपरेशन टायगर’वरून आरोप-प्रत्यारोप

धाराशिव : तुळजाभवानी मंदिराच्या सुरक्षेसाठी बसवण्यात येत असलेल्या सीसीटीव्ही कॅमेऱ्यांच्या मुद्द्यावरून धाराशिवचे पालकमंत्री प्रताप सरनाईक आणि शिवसेना ठाकरे गटाचे आमदार कैलास पाटील यांच्यात शाब्दिक वाद रंगला आहे. कैलास पाटील हे प्रसिद्धीच्या झोतात येण्यासाठी चिनी कॅमेऱ्यांचा मुद्दा उपस्थित करत असल्याची टीका पालकमंत्री सरनाईक यांनी केली, तर पाटील यांनी सरनाईक यांच्या वक्तव्याला प्रत्युत्तर देत ‘माझ्या मुद्द्यावर उत्तर द्या, टिंगल-टवाळी करू नका’, असा पलटवार केला आहे.

तुळजाभवानी मंदिराच्या सुरक्षेसाठी बसवण्यात येत असलेल्या सीसीटीव्ही यंत्रणेच्या गुणवत्तेवर आणि त्याच्या सुरक्षाविषयक वापरावर आमदार कैलास पाटील यांनी प्रश्न उपस्थित केले आहेत. या पार्श्वभूमीवर पालकमंत्री प्रताप सरनाईक यांनी पाटील यांच्यावर निशाणा साधला.

कैलास पाटील हे प्रसिद्धीच्या झोतात येण्यासाठी तुळजापुरात चिनी कॅमेरे बसवले जात असल्याचा आरोप करत असल्याची टीका सरनाईक यांनी केली. तसेच, “शिवसेना ठाकरे गटाचे आमदार कैलास पाटील हे ऑपरेशन टायगरचा दुसरा भाग आहेत,” असा दावा त्यांनी केला.

तुळजापुरात बसवण्यात आलेल्या सीसीटीव्ही कॅमेऱ्यांच्या माध्यमातून कैलास पाटील यांच्यावर ‘वॉच’ ठेवूनच ‘ऑपरेशन टायगर’ यशस्वी केले जाईल, अशी उपरोधिक टिप्पणीही पालकमंत्री सरनाईक यांनी केली.

कैलास पाटलांचा पलटवार

पालकमंत्री सरनाईक यांच्या वक्तव्याला उत्तर देताना आमदार कैलास पाटील यांनी आपला मुद्दा स्पष्ट करण्याची मागणी केली. “माझा मुद्दा काय होता आणि पालकमंत्री सरनाईक उत्तर काय देतात, याची माहिती असेल तर त्याची माहिती द्यावी. विनाकारण टिंगल-टवाळी करून विषय दुसरीकडे नेऊ नये,” असे पाटील म्हणाले.

तुळजाभवानी मंदिराचा विषय हा टिंगल-टवाळी करण्याचा नाही, तर मंदिराच्या सुरक्षेशी संबंधित गंभीर विषय असल्याचे त्यांनी स्पष्ट केले. आपण उपस्थित केलेल्या प्रश्नांना तथ्यात्मक उत्तर देण्याऐवजी विषयाला वेगळे वळण देऊ नये, असेही पाटील यांनी म्हटले.

दरम्यान, ‘ऑपरेशन टायगर’च्या वक्तव्याच्या पार्श्वभूमीवर आपल्या राजकीय भूमिकेबाबत कैलास पाटील यांनी स्पष्ट शब्दांत भूमिका मांडली. “मी शिवसेना ठाकरे गटातच आहे आणि ठाकरे गटातच राहणार,” असे त्यांनी ठामपणे सांगितले.

तुळजाभवानी मंदिराच्या सुरक्षेचा मुद्दा आणि सीसीटीव्ही कॅमेऱ्यांवरील प्रश्नांवरून आता पालकमंत्री प्रताप सरनाईक आणि आमदार कैलास पाटील यांच्यातील आरोप-प्रत्यारोप अधिक तीव्र झाले आहेत.