कळंब: शहरातील कसबा गल्ली भागात मागील भांडणाच्या कारणावरुन एका १९ वर्षीय तरुणावर चाकूने हल्ला करण्यात आल्याची घटना घडली आहे. बुधवारी (दि. ३) सायंकाळी ५ वाजेच्या सुमारास सुतार नेट जवळ हा प्रकार घडला. याप्रकरणी कळंब पोलीस ठाण्यात एकावर गुन्हा दाखल करण्यात आला आहे.
मिळालेल्या माहितीनुसार, फिर्यादी अनिकेत अविनाश पांचाळ (वय १९, रा. कसबा गल्ली, कळंब) हे बुधवारी सायंकाळी आपल्या घराच्या भागातील सुतार नेट जवळ होते. यावेळी आरोपी आकाश किसन जावळे (रा. कसबा गल्ली, कळंब) याने मागील भांडणाचा राग मनात धरून अनिकेत यांच्याशी वाद घातला.
आरोपीने फिर्यादीला अश्लील शिवीगाळ करत लाथाबुक्यांनी मारहाण केली. एवढ्यावरच न थांबता आरोपीने हातातील चाकूने अनिकेत यांच्यावर वार करून त्यांना जखमी केले. तसेच “तुला जिवे ठार मारतो,” अशी धमकी दिली.
याप्रकरणी जखमी अनिकेत पांचाळ यांनी दिलेल्या तक्रारीवरून कळंब पोलीस ठाण्यात आरोपी आकाश जावळे याच्याविरुद्ध भारतीय न्याय संहिता (BNS) कलम ११८(१), ११५(२), ३५२, ३५१(२) आणि ३५१(४) अन्वये गुन्हा दाखल करण्यात आला आहे.
