‘आपला जीव धाराशिव’ की ‘जि.प. शाळांचा जीव घेणारं धाराशिव’? एका फटक्यात ५६ शाळांवर प्रशासनाचा घाला!

धाराशिव:  एकीकडे ‘आपला जीव धाराशिव’ या गोंडस नावाखाली जिल्हा परिषदेच्या शाळांची गुणवत्ता वाढवण्याचे ढोल बडवले जात आहेत, तर दुसरीकडे प्रशासनाने अत्यंत चलाखीने ५६ जिल्हा परिषद शाळांचा चक्क ‘गळा घोटण्याचा’ घाट घातला आहे. जिल्हा परिषदेच्या या ‘तुघलकी’ निर्णयामुळे जिल्ह्यातील ५६ शाळा बंद पडण्याच्या मार्गावर आहेत. या निर्णयामुळे ग्रामीण भागातील विद्यार्थ्यांचे आणि शिक्षकांचे धाबे दणाणले असले, तरी खासगी संस्थाचालक मंडळी मात्र खुशीत पेढे वाटण्याच्या तयारीत असल्याची चर्चा रंगू लागली आहे!

प्रशासनाला हे ‘एकत्रीकरण’ कितीही सोपे वाटत असले, तरी त्याचे परिणाम भयंकर आहेत. दोन शाळा एकत्र केल्यामुळे साहजिकच विद्यार्थ्यांची संख्या एकाच छताखाली येईल, पण याचा सर्वात मोठा फटका बसेल तो शिक्षकांच्या आणि कर्मचाऱ्यांच्या पदांना!

प्राथमिक शिक्षकांचे हे गंभीर प्रश्न सोडवण्याऐवजी प्रशासन त्यांच्यावर नवे प्रयोग लादत असल्याने शिक्षकांचा संयम आता सुटला आहे. जिल्ह्यातील सर्व शिक्षक संघटनांनी एकत्र येत ‘समन्वय समिती’ स्थापन केली असून, प्रशासनाविरुद्ध मोठे आंदोलन उभारले आहे.

एवढेच नाही, तर प्रशासनाने वेळीच शहाणपण दाखवून ५६ शाळा एकत्रीकरणाचा हा अन्यायकारक निर्णय रद्द करून पूर्ववत शाळा सुरू न ठेवल्यास, भविष्यात जिल्हा परिषदेच्या ‘एक जीव धाराशिव’ या लाडक्या उपक्रमावरच थेट बहिष्कार टाकून त्याला कडाडून विरोध करण्याची तयारी या संघटनांनी चालवली असल्याचे खात्रीलायक वृत्त आहे.

एकूणच काय, तर ‘व्हिजन’च्या नावाखाली सुरू असलेला हा प्रशासकीय मनमानीचा ‘इव्हेंट’ आता शिक्षकांच्या आणि विद्यार्थ्यांच्या जीवावर उठला आहे. प्रशासनाने हे शाळा बंदीचे धोरण थांबवले नाही, तर धाराशिवच्या शिक्षणाचे ‘तीन तेरा’ वाजायला वेळ लागणार नाही!