तुळजापूर: सोलापूर-तुळजापूर रोडवर सांगवी फाटा येथे झालेल्या भीषण अपघातात एका व्यक्तीचा मृत्यू झाला आहे. चॉद गब्बू पठाण (वय 45, रा. डुकडेगाव, ता. वडवणी, जि. बीड) हे एमएच 22 वाय 9685 क्रमांकाच्या मोटरसायकलवरून सोलापूरहून तुळजापूरकडे जात होते. सांगवी फाट्याजवळ पोहोचल्यावर एमएच 20 बीएन 2883 क्रमांकाच्या भरधाव कारने त्यांच्या दुचाकीला पाठीमागून जोरदार धडक दिली. या अपघातात चॉद पठाण गंभीर जखमी झाले आणि त्यांचा जागीच मृत्यू झाला.
या घटनेची माहिती मिळताच तुळजापूर पोलीस ठाण्यात गुन्हा दाखल करण्यात आला आहे. मयत चॉद पठाण यांचे नातेवाईक मुबारक चाँद पठाण (वय 24) यांनी 5 फेब्रुवारी 2025 रोजी पोलिसात तक्रार दाखल केली आहे. तक्रारीनुसार, कारचालक कलीम बांगी (रा. सोलापूर) याने त्याची कार निष्काळजीपणे चालवत असताना अपघात घडवला. पोलिसांनी बांगी यांच्यावर भारतीय दंड संहिता कलम 279, 304 (अ), 134 (1) आणि मोटर वाहन कायदा कलम 184 अन्वये गुन्हा दाखल केला आहे. पुढील तपास तुळजापूर पोलीस करत आहेत. या अपघातामुळे परिसरात हळहळ व्यक्त होत आहे.
रस्ते अपघातात तरुणाचा मृत्यू
मुरुम : मुरुम-मोड ते मुरुम या राष्ट्रीय महामार्ग ५४८ ब वर झालेल्या भीषण रस्ते अपघातात एका २७ वर्षीय तरुणाचा मृत्यू झाला. किरण विश्वनाथ पवार असे या तरुणाचे नाव आहे.
मिळालेल्या माहितीनुसार, किरण पवार हे त्यांच्या एमएच १४ झेड ६२०२ क्रमांकाच्या मोटरसायकलवरून सुंदरवाडी शिवारातून मुरुमकडे जात होते. त्याचवेळी, एमएच २९ सीबी २३३५ क्रमांकाच्या ट्रॅक्टरच्या चालकाने निष्काळजीपणे आणि हलगर्जीने ट्रॅक्टर चालवत त्यांच्या मोटरसायकलला समोरून धडक दिली. या जोरदार धडकेत किरण पवार गंभीर जखमी झाले आणि उपचारादरम्यान त्यांचा मृत्यू झाला.
या घटनेनंतर, मृतकाचे वडील विश्वनाथ लक्ष्मण पवार (वय ७३) यांनी ५ फेब्रुवारी रोजी मुरुम पोलीस ठाण्यात फिर्याद दाखल केली. या फिर्यादीत त्यांनी ट्रॅक्टर चालकाच्या निष्काळजीपणामुळे अपघात झाल्याचा आरोप केला आहे. पोलिसांनी भादंवि कलम २८१, १२५ (अ), १२५ (ब), १०६ (१) सह मोटार वाहन कायदा कलम १८४ अन्वये गुन्हा दाखल केला असून पुढील तपास सुरू आहे. या अपघातामुळे परिसरात हळहळ व्यक्त होत आहे.
